Ateroi aeroplani i parë me udhëtarë në aeroportin e Ohrit

Pas pothuajse katër muajve, në aeroportin e Ohrit “Shën Apostoli Pal” ateroi aeroplani i parë, me çka edhe zyrtarisht fillon sezoni kryesor veror turistik në brigjet e Liqenit të Ohrit.

Me fluturimin e parë të realizuar nga aerokompania në Ohër “Chair Airliner” arritën udhëtarët e parë në linjën e rregullt nga Cyrihu.

Aeroporti në Ohër, si dhe ai në Shkup, ishin tërësisht të mbyllur për udhëtarë prej 15 marsit të këtij viti, kur u vendosën masa të posaçme restriktive për parandalim të përhapjes së koronavirusit.

Situata e re e imponuar, e shkaktuar nga epidemia, rezultoi me anulim të një numri të madh të aranzhmaneve të caktuara paraprakisht të turistëve të huaj në hotele dhe kapacitete private në rivierën e Ohrit dhe Strugës.

Hapja e sërishme e aeroportit jep optimizëm të caktuar tek punonjësit turistikë në Ohër se megjithatë edhe këtë verë në qytet dhe në brigjet e Liqenit të Ohrit do të ketë turistë të huaj. Në favor të pritjeve të tilla shkojnë edhe paralajmërimet e disa tur-operatorëve të caktuar të huaj se do të realizojnë një pjesë të aranzhmaneve të parapara nga ajo që shumë turistë nuk i anuluan por i ricaktuan planet për pushim në Ohër.

Tashmë nga kjo javë është planifikuar që krahas ripërtëritjes së linjave të rregullta të realizohen disa fluturime çarter me turistë nga Polonia dhe Holanda.