Kovaçevski: Maqedonia ishte ndër tre vendet në botë që për 20 vite nuk kanë bërë regjistrim

Kovaçevski: Maqedonia ishte ndër tre vendet në botë që për 20 vite nuk kanë bërë regjistrim

Kryeministri Dimitar Kovaçevski në paraqitjen e tij sonte në emisionin 360 Gradë, në Alsat, është shprehur i kënaqur me regjistrimin e kryer, të cilin e ka vlerësuar si të suksesshëm, duke shtuar se është bërë me metodologji të miratuar nga Eurostat.

“Ne kemi qenë një nga tre vendet në botë, që nuk kemi bërë regjistrim për aq kohë. Ai u krye në bazë të një metodologjie të miratuar nga Eurostat, dhe me praninë e ekspertëve të BE-së. Është një model i kombinuar i regjistrimit që përdor nëntë baza të dhënash nga institucione të ndryshme”, tha Kovaçevski.

Ai theksoi se të dhënat kryesore nga regjistrimi i popullsisë, janë të dhënat që tregojnë rënie të numrit të popullsisë në vend.

Siç tha ai një trend i tillë ishte i përbashkët për të gjitha vendet e Ballkanit.

“Nëse shikojmë të dhënat e regjistrimit në Serbi dhe Bullgari etj; ka një rënie të numrit të popullsisë dhe për këtë arsye ky regjistrim është i rëndësishëm, për të krijuar politika ekonomike që do të kthehen në kapitalin njerëzor, dhe do të hapin mundësi të reja, veçanërisht për të rinjtë”, tha Kovaçevski.