Memoriali i mbështetësve të Erdoganit tek Liqeni Artificial mbulohet me flamurin kombëtar

Një grup aktivistësh protestuan dje tek memoriali i mbështetësve të Erdoganit në Kodrat e Liqenit të Tiranës, duke e mbuluar atë me flamurin kombëtar.

Elida Jorgoni ishte njëra prej tyre që hipi mbi memorial, duke mbuluar me flamur emrat e mbështetësve të Presidentit të Turqisë që u vranë pas thirrjes së tij dhe të imamëve të xhamive për të dalë në shesh kundër segmenteve të ushtrisë, ku sipas pretendimeve qeveritare turke, u tha se tentuan të përmbysin pushtetin e Erdoganit.

“I mbulova me duar 2 vulat e turpit neo-osman.

U mërzita kur m’a mori Polici të Bekuarin Flamur, por dhe u gëzova, kur m’a dha dhe e putha të Shenjtëruarin Flamur, Kuq e Zi.

Te Kodra e Liqenit në Tiranë, më 17 gusht 2019″, – shkruan aktivistja Jorgoni në një postim të saj.

Elida Jorgoni shquhet për ndjenjat e saj të hekurta patriotike dhe këtë ajo e shpreh më së miri në profilin e saj të ‘Facebook’-ut, ku së fundmi ka ndarë edhe një postim, sipas saj për armikun grek të shqiptarëve, Kozmanë, i cili do të nderohej nga përfaqësues grekë në Kolkondilas të Fierit dhe thirrje për t’i ndaluar.

Vendosja e memorialit në kodrat e Liqenit Artificial të Tiranës shkaktoi mjaft reagime publike, ndërsa pati prej tyre që ofruan edhe shpërblime monetare për ata që do ta prishnin.

Një ndër reagimet e shumta ishte edhe ai i akademikut Artan Fuga, i cili shprehet se nuk ka asgjë personale me Turqinë apo me Erdoganin, por se vendosja e kësaj përkujtimoreje nuk ka kurrfarë lidhjeje përveç se politike.

“Te mos krahasojmë simbolika pa asnjë lidhje mes tyre!

Unë nuk kam asgjë me Turqinë, madje e respektoj fort sikurse respektoj çdo vend dhe çdo popull, nga më i madhi te më i vogli.

Unë nuk kam asgjë kundër që të respektohet ligji në cdo vend të botës dhe të respektohen njerëz që janë sakrifikuar për idealet e tyre që i kanë quajtur të lirisë!

Unë nuk kam ndonjë koment për të bërë as për pushtetin e z. Taip Erdogan sepse nuk kam bërë ndonjë studim për të. As për marrëdhënien e tij me sektin sufist!

Unë nuk kam dëshirë as të flas për pllakat që vihen te liqeni a kudo qoftë edhe për të rënet në Turqi për të mbrojtur rendin e pushtetin!

Por unë di me saktësi që midis nderimit të dëshmorit Adem Jashari me emrin e një parku në Turqi dhe pllakës përkujtimore për të rënet në rrezistencë ndaj grushtit të shtetit në Turqi, nuk ka asnjë paralele që mund të hiqet.

Cdo paraele midis tyre është një keqkuptim historik në mos një manipulim propagandistik!

Le të heqim dorë nga këto!”, – shkruan Fuga në mesazhin e tij.

Lexoni më shumë, vijimi i reagimit të akademikut Artan Fuga:

Adem Jashari është i lidhur me një sakrificë për një çështje kombëtare kurse pllakati për dëshmorët kundër grushtit të shtetit me një çështje politike!

Simbolika e Adem Jasharit nuk përkëdhel asnjë njeri në pushtet ose me pushtet as në Kosovë dhe as në Shqipëri, kurse përkujtimi i dëshmorëve turq në një pllakatë përkujton dhe është në një vijë politike me një pushtet të caktuar aktual në Turqi.

Simbolika e Adem Jasharit është konsensuale dhe plebishitare në mes shqiptarëve, ajo figurë është e nderuar edhe nga aleatët dhe partnerët strategjikë perëndimorë të Shqipërisë, kurse cështja e grushtit të shtetit është objekt debatesh dhe kundërshtish në Turqi, Perëndim dhe Shtetet e Bashkuara, pra shenjon marrje pozicioni politik për një çështje të brendshme të Turqisë këtij vendi mik. Përse jo është në atë kohë edhe një diskordancë mes shumë vendesh perëndimore dhe shtetit të Turqisë!

Shqipëria merr pozicion politik për një çështje politike të brendshme në shtetin mik turk!

Ja pra dallimet që nuk mund të mbulohen me një krahasim gjeopolitik e politik të sipërfaqshëm e kështu më këmbë!

Pllakat t’i vemë po deshi Bashkia, por mendjen mos të na e turbullojë, i kam rixha!
Bashkia e Tiranes ka marre nje qendrim politik per.nje ceshtje te brendeshme te nje shteti tjeter lidhur me nje ngjarje te kohes sone. Kaq. Uroj ta kete bere me pelqimin e ministrise se jashtme.
Gjithsesi lavdi Adem Jasharit dhe të gjithë të rënëve për Kosovën, nderim për të rënët dhe viktimat e dhunës në Turqi e kudo, nderim për të gjithë të vdekurit nga cdo anë e barrikadës që janë ndodhur si viktima!

/bulqiza.info/

Please publish modules in offcanvas position.