Владата со благодарност до граѓаните, медиумите и политичките субјекти по потпишувањето на Протоколот за НАТО

Владата со благодарност до граѓаните, медиумите и политичките субјекти по потпишувањето на Протоколот за НАТО

 Владата на Република Македонија по потпишувањето на Протоколот за пристапување кон НАТО упати благодарност до сите граѓани од сите етнички заедници за мудроста и трпеливоста која ја покажале во изминатите 25 години.

– Вашата мудрост и трпеливост да не ги прифатите повиците за конфликт и поделби и да изберете политики кои носат економски просперитет, безбедност и заедништво денеска го донесоа првиот голем резултат, изјави владиниот портпарол Миле Бошњаковски пренесувајќи ја пораката од Владата по денешното потпишување на Пристапниот протокол во НАТО.

Од Владата упатија благодарност и до медиумите за нивната суштинска улога во исполнувањето на основните стратегиски цели на државата, како и до сите поранешни политички субјекти на кои членството во Алијансата им бил врвен приоритет.

По денешното потпишување следува ратификација на Пристапниот договор од страна на Грција, а во истиот момент измените на уставните амандмани стапуваат на сила и Владата која од тој момент станува Влада на Република Северна Македонија, ќе ги започне мерките и активностите за целосна имплементација на Договорот од Преспа.

– Взаемно, ние и Грција ќе испратиме писмо до генералниот секретар на Организацијата на Обединетите Нации, како и до сите останатите меѓународни организации кои ќе ги информираме дека спорот за името е надминат и оти новото уставно име на нашата земја е Република Северна Македонија, појасни Бошњаковски.

Одлуката за членство во НАТО, македонското Собрание ја има донесено уште во 1993 година. 

Please publish modules in offcanvas position.