Пендаровски: Да се прави разлика меѓу СЈО и истрагата за 'Рекет'

Претседателот Стево Пендаровски смета дека мора да се направи разлика меѓу истрагата за „Рекет“ во Јавното обвинителство и работата на обвинителите во Специјалното јавно обвинителство.

Тој во интервју за Радио Слободна Европа вели дека е разочаран од тоа што го слуша во последниве денови во врска со СЈО. Апелира до надлежните што е можно побрзо и потемелно да ја спроведат истрагата и да не обрнуваат внимание на евентуалните политички притисоци, затоа што процесирањето на предметот е битно и за СЈО и за демократските процеси што ѝ претстојат на земјата.

– Една работа е работата на институцијата СЈО до овој момент и постапките што ги воделе различни обвинители, не само Катица Јанева. Сосема друга работа е последниов случај за кој јас ургирам и од оваа позиција, како и да се сфати, до надлежните органи да ја процесираат што побрзо и што подлабоко за да не остави ни најмала дамка на работата на институцијата како таква. Да заклучам, СЈО беше и тоа како потребно во времето кога ги правевме демократските промени. СЈО во некаков облик, во некој дел од системот на редовно јавно обвинителство и те како е потребно и во наредниот период да ги процесира криминалите, не само на оние што биле на власт, туку на нас што сме денеска на власт, вели Пендаровски.

Шефот на државата истакнува дека СЈО е клучната институција која, покрај Преспанскиот договор, ни ги отвори вратите на ЕУ и на НАТО.

Please publish modules in offcanvas position.